سكشن بحري

السلام عليكم ..
والله انا بدأت احس ان البلوج معمول عشان المصايب النفسيه اللي بتحصلنا ف الكليه دي .. و مش عارفه الحقيقه بعد الكليه ان شاء الله ان شاء الله ما تخلص انا حكتب ايه .. بس هي تخلص بقى و ان شا الله بعدها اكتب عن ارتفاع اسعار البرتقال ابو سره و تأثير ذلك على نفسيه الشعب المصري ..

النهارده كان سكشن بشمهندسه عزيزه على قلبي جدا يعني منزلتها ف قلبي زي منزله الكبيره كده بالظبط .. حاولت كتير اعبرلها و اصرحلها بمشاعري الرقيقه جدا اوي دي من ناحيتها .. بكل الوسائل ..لكن البعيد ما بيحسش

و بدأت تشرح ..
و بدأت انا ابني اسطول المراكب ده ..




طبعا لان ايمان بتكن لنفس المعيده نفس المشاعر اللي انا بكنهلها بالظبط .. اشتركت معايا ف عمل المراكب دي .. و كل واحد عمل مراكب على اد حجمه .. و بالتالي انا عملت مراكب كبيره . و ايمان عملت مراكب ضئيله ( سوري يا ايمان :D )

ابص عليها ..الاقيها لسه ربنا مديها القوه و العافيه و مستمره ف الشرح ..
غيرت اتجاه الاسطول ..







حتى القبطان جبته .. و الله ما بخلت




وابحرنا ف عالم المجهول مع البشمهندسه الرائعه .. لا ! بل الاكثر من رائعه .. بشمهندسه نهى .. اللهم اما صلي ع النبي يعني ..

المره الجايه اعملها فريق الكشافه ان شاء الله ..

؟؟

هو في ايه السنه دي بالظبط ؟؟

my status

مساء الفل ..

حاله غريبه اللي انا فيها حاليا دي ..

اولا .. شايفه من كل حاجه سته تقريبا ..

ثانيا .. لا مبالاه ..اخويا كان اعد يحكي ف موضوع الله اعلم كان ايه .. و بعد ما خلص كلام بيقولي ايه رأيك .. يلاقي ادامه واحده فاتحه بقها و تقوله .. هــــــــــــــــــــــــــــــــــــاااا ؟

ثالثا .. حسه اني همدانه لكن مش عايزه انام ..عايزه اتنح

رابعا ..انا يا بردانه يا اما حرانه .... او جعانه ؟

خامسا .. ايه التوبك ده .. اي كلام بيتقال :)

طيب كفايه كده النهارده .. سلام !

finally ..

السلام عليكم ..

الحمد لله ايــــــــــــــــــــــــام فظيعه و عدت ..

زي اي محنـــــــــــه و بتعدي ..

بس امتحان النهارده خالاني و لاول مره اعيـــط من حاجه تخص الكليه (كدراسه) .. يجيلي ضغط و سكر و قلب منها ماشي .. لكن النهارده عيط فعلا م الامتحان و مكنتش حتى طايقه اكلم حد ..

حسبي الله و نعم الوكيل .. و يـــــــــــــــــــــــــــــــــــــــــــــــــــــــــــا رب اخلص بقى م الكليه دي بكل حاجه فيها !

...

Pausing My Life

كفـــــــــــــــــــــــــــــــــــــــــــايه

!!!!!!!!!!

على اد لحافك مد رجليك

السلام عليكم ..
دايما الممنوع مرغوب ..
و اللي مش موجود عايزينه ..
و اللي ما ينفعش .. لا بقى هو ده ..
والمستحيل لازم يتحقق ..

طب ليه ؟؟؟
ليه مش على اد لحافك تمد رجليك .. و على اد امكانياتك تشتغل .. و باللي ف ايدك تبقى راضي .. و باللي تقدر تحققه تبقى مكتفي بيه ..
مش لازم ابدا حلمك يزيد عن حده .. و مش لازم ابدا اني اعمل قنبله عشان ابقى بني ادم ..

ما تاخد الدنيا براحه .. و بص للي ف ايدك و بس .. و على اد اللي معاك اشتغل .. و خلي حلمك دايما معقول و منطقي .. ما تشطحش بتفكيرك لابعد سما .. لانك حتنزل رزع لسابع ارض ..

مبادئ ::

1-ارض باللي ربنا كتبوا .. ارضى اوي
2-بص للي معاك و ما لكش دعوه باللي ف ايد غيرك .. لانه ما يخصكش ف حاجه .. و لو واخد حقه ف حاجه مش عندك فانت واخده ف حاجه مش عنده
3- امشي خطوه خطوه .. و لازم خطواتك تكون ف حدود امكانياتك .. و احلامك تكون في اطار المعقول
4-ما تبصش ورا .. اللي حصل انتهى .. شر تستفيد منه .. خير تبني عليه .. لكن ف النهايه هو برضه ورا
5-لما تقع اوم اقف بسرعه ..
6- ما تندمش على اللي حصل .. لانه قدر و كان حيحصل حيحصل

و برضه .. على اد لحافك مد رجليك .. ف كل حاجه ف الحياه

ســـــــلام :)

I'm happy :)

كلمتين كده

السلام عليكم ..

اولا .. الحمد لله بالنسبه للبوست اللي فات الواحد حالته النفسيه بتتحسن بمرور الوقت .. و ربنا يستر ..

ثانيا .. النهارده دارت بيني و بين بابا منافشه .. مش مناقشه بالظبط هو انا قلت كلمتين ف اول المكالمه بعد كده الكلام كله منه الا لو انا حبيت اضيف حاجه ..

عايزه اقول .. ان مفيش حد ممكن يحبك ف الدنيا دي اد اهلك ..

مفيش حد ممكن ينصحك بقلب و مش عايز منك اي مقابل غير انك تبقى احسن و افضل منه غير اهلك ..

ما بيكلمكش ف حاجه تخصك غير عشانك .. مش بينصحك بحاجه غير عشان تنفع بيها نفسك ..

لو حكتلوا مصايب بتعملها .. متبقاش خايف تقل من نظره او يسيبك او يبصلك بصه ما تعجبكش .. تلاقيه فجأه بيقولك ده انا ابوك يا عبيط .. :D ( ممكن ما يقولش يا عبيط .. عادي جدا )

اهلك .. و بالتحديد الاب و الام .. هو اللي كل مشاعرهم بجد .. مش متغيره .. صادقه .. مطلقه .. هدفها الاول و الاخير انك تكون احسن واحد على وش الدنيا و احسن منه كمان ..

كام نصيحه كده ..

• احمد ربنا سبحانه و تعالى على النعمه دي .. و حافظ عليها بقى .. و خليهم دايما راضيين عنك ..
• قوم حالا بوس ايد ابوك و امك و قلهم ربنا يخليكوا ليا ..
• ما تكسفش ابدا منهم .. خليك صريح معاهم و لو عايز نصيحه مكتسبه من خبره سنين و تكون م القلب و مفيش وراها اي اغراض تانيه .. عليك و عليهم :D
• بس ..

ســــــلام ..

رساله مني .. ليا

لما تبقى متعلق بحاجه اوي ..

اما تطلع تجري وراها عشان توصلها ..

اما تحس انك مش عارف تمشي ف الدنيا مفتح و شايف ادامك غير بوجودها ..

اما تشقلب ف الجو عشان عايزها ..

اما تدعي ربنا ليل و نهار لمده سنين انها تتم ..

و ف الاخر تختـــــــــــــــــــفي .. وتتحطم .. و تنتهي ..

اظن بـــــــــقى مفروض تفهم و من زمـــــــــــــــــان .. ان ربنا سبحانه و تعالى مش عايزها ليك .. و الخير مش فيها !!

يا رب قويـــــــــــني ..

حلم ع الماشي

السلام عليكم ..

الموضوع مش زي ما تخيلتوه .. حلم و طموح و كلام من ده ..

لا ده حلم بجد حلمته و انا نايمه .. و انا اللي زيي اصلا النوم خطر عليه .. لاني بطلع كابتي كله ف احلامي و ف الاخر اصحى مخضوضه ..

بس ده حلم كوميدي شويه .. في شويه حاجات كده ف اول الحلم ليها علاقه بحياتي انا و ملهاش علاقه بموضوعنا ف حنطنشها :D

نيجي للجزء المهم .. حلمت اني جايه الكليه و ايمان جايه بتقولي انتي كنتي فين و كده ؟ و بتقولي لسته المشاريع نزلت انتي ما بعتيهاش ليا ليه ( ده طبعا لان اخر حاجه قبل ما انام قريت لسته المشاريع بتاعه التخرج بتاعتنا و شتمتها و نمت :D ) فقلتلها انا بعتلك اللينك بتاعها و الله و دلوقتي نسأل و نتأكد .. كان معانا اتنين صحابنا قالولنا احنا حجزنا تذكره عشان نسأل ( ف الحلم السؤال للشؤون بقينا بنحجزله تذكره و نقف ف تابور عشان نسأل سؤال و ميعاد الاسئله من الساعه 2 لغايه 3 ) و اسمنا اخر اسم ف الطابور فبقولها خلاص يا ايمان حجزولنا معاهم اهم .. دلوقتي نسأل و نفهم ..

اه اه اه .. بجد والله سبحان الله .. عقلي الباطن مسيطر عليه فكره واحده ..ان الكليه دي مفتريه و بتذلنا و حطلع روحنا باذن الله ( قال يعني هي لسه مطلعتش) ..

الموضوع مبقاش هزار ده انا فعلا مخي لسع !

النهارده .. بعد ما خلصنا و مشينا و ركبت التاكسي انا و ايمان و بطلع بقى الفلوس عشان احاسب .. اتفاجأت اني نسيت موبايلي ف المعمل !!

و الله الراجل بتاع التاكسي الله يكرمه ( بعد ما حمد ربنا و باس ايده وش و دهر انه هو بعقله ) راح مفرمل لوحده كده فجأه من غير ما اقوله حاجه.. و رحت نازله جري انا و ايمان راجعه الكليه تاني ..

انا فعلا كنت بكامل قوايا العقليه قبل ما ادخل الكليه.. كنت كويسه كده و مركزه ..بابا ما بقاش يقولي غير ركزي ..صحصحي .. بصي يا بنتي ادامك ..دايما انا ماشيه و دماغي ف كوكب تاني :D

دلوقتي بقيت عبره ف العيله .. يعني اللي مش حيشرب اللبن قبل ما ينام يا ولاد حيبقى شبه رنا كده .. ( دعــــــابه :D )

طب و بعدين .. و انا صاحيه بتعذب منها و و انا نايمه بقطعلها تذاكر .. اروح فين ؟؟؟ :D

يلا ســـــــلام ..

مش لاقيالي عنوان D:

السلام عليكم ..

طبعا هي مشكله .. لكن حصيغها ف اطار كوميدي للتخفيف من حده الكارثه الاجتماعيه اللي البلد دي بقت فيها ..

زماااان ايام ما كنا اطفال .. كان بابا و ماما يخلونا لما نلعب .. نلعب مع بنات صحابنا ( بتكلم عليا كبنت يعني :D) و منلعبش مع ولاد و لما كنا نقول ليه ؟ كانت الاجابه كلمه واحده عيـــــــــب .. و الموضوع خلص ..

كبرنا و درسنا دين .. و عرفنا يعني ايه حلال و حرام .. بقى فيه تربيه و قيم و عادات و فهمنا معنى كلمه عيب بكل ابعادها ..

حاااليا .. كل المبادئ اتغيرت .. كل العادات اداست بال... مه , و ما شاء الله ما شاء الله بقى في عجب بيحصل حوالينا ..

و ما شاء الله ما شاء الله بقى الحياه هيصه .. و البنات و الولاد لوكشه واحده مفيش فرق .. و هلم جر

بقى في صاحبي و صاحبتي .. قسم بالله انا لو دفعولي فلوس و قالولي قولي اللفظ ده ما ادر اقوله ..

بقيت بسمعها اكتر من سلام عليكم .. بقى تيتو و ميزو و فوفو و كوكو و كل اسماء اللبان دي بقت بتتقال عادي جدا قدام مامي و بابي عادي جدا ..

ايوه يا مامي انا مع ميزو ف النادي !!!

ميزو ف النادي ؟؟ ده على اساس ان ميزو ده ابن اختك .. و الداهيه الكبيره الاقي مامي عادي .. و ما تتاخريش !

اموت نفسي انا بقى و لا ارمي نفسي م التاكسي ..

بلاش .. و الله و دي قدام عيني ف الجامعه لدرجه اني شهقت و تنحت ليهم ف الجامعه لما كنت حضرب ..

رفعت و منال (اسماء مستعاره ..) تحت الشجره يا وهيبه

..

بعدين رفعت الله يكرموا مطرح ما هو اعد كان لابس كاب و يظهر محرره .. منال صعب عليها قامت شايله الكاب و عدلتله شعره ( لان طبعا الكاب بوظ السابايكي ) .. طبعا رفعت اضايق لان منال الرخمه الوحشه بوظت ستايله ..

راح ضاربها ف كتفها .. راحت ضارباه ف كتفه راحت ايمه واقفه راح مديها بالشلوت !

هنا انا شهقت يا رمضان ..

كــــــــــــــــــاتير والله , كــــــــــــاتير عليا اللي بيحصل ده ..

امبارح برضه كنت ف الشارع بشتري حاجه للبيت كأي مواطنه مصريه طبيعيه عندها اربع كور دم حمرا ف دمها ..

و راجعه حرانه و ارفانه .. و ماشيه و الاقي زيزو و فوفو و عبد الجليل الخ الخ الخ .. كل ملموم و واقف مش معروفلهم ملامح من كتر

العبط اللي بيحصل .. و ده بيخبط دي و دي تضرب ده و ضحك و هزار و انا معديه جمبهم عايزه اديهم بالكيس البالاستيك على نفوخهم ..

انا خلاص ارفت م الشارع و م البشر دي .. و حموت و افهم سؤال واحد بس .. هي لما ترجع البيت و تخش على ماما و بابا اللي اكيد حيبقوا مامي و بابي .. بتقولهم ايه ؟؟ بلاش بتنام عادي كده و ضميرها فله ازاي ؟؟ طب مش بتحس بقلق او بحاجه غلط من باب ختى كميه الناس اللي بتكلمهم و الله اعلم مين بيقول على مين ايه ؟؟ بأي بتنجان ف البطاطس ؟؟

طبعا انا بحكي بهزار للفضفضه .. لكن هي كارثه و الله اعلم حتروح بينا لفين ؟

ســــــــلام ..

خلصت 1

السلام عليكم ..

اليوم بحمد الله اتممت كورس CCNA بكل تفاصيله .. سبق و ذكرت ايمان روعه الكورس و المكان ف البلوج بتاعتها :D
بجد انا حسه براحه نفسيه اني انجزت حاجه مهمه و كان نفسي فيها من زمان .. فاضل باذن الله الامتحان لكن حصبر شويه لما اذاكر كويــــــــــــــس جدا ..
من غير ما اطول .. انا سعيده .. و بجد فعلا اروع احساس ممكن تحسه لما تتعب عشان هدف .. و تحققه ف الاخر ..
يلا انا قلت اسجل حاجه خلصت .. و من بكره ان شاء الله حنبدأ التدريب .. الله المستعان ..
ســــــــلام زواري الكرام :)

اصطبحنا و اصطبح الملك لله

ما كنا نايمين ..

والله حرام ..

للاسف المبالغ فيه .. بيتنا موقعه استراتيجي جـــــــدا ..

ساكنين قدام مستشفى !

طب و ايه يعني ؟ .. و ايه يعني ؟؟ لا يعني كتــــــــــير .. ساكن قدام مستشفى يعني لازم تصحى كل يوم على صوت " يــــــــــــــا لهوي , يا خبر اســــــــــــود , سبتني لمين بعدك , ده لسه عريــــــــــــس , لا ! حــــــــــرام , ربنا ينتقم منكـــــوا " ..

كل يوم او بدون مبالغه يعني يوم و يوم .. اصحى على اصوات الصريخ دي ..

واحد مات تلتف العيله كلها حوالين بعض و يبدأ النواح و الصريخ ..

السؤال بقى .. هو انتي لما تعملي كده هو حيرجع تاني ؟ و لا لما تقولي ربا ينتقم منكوا ده على اساس انهم السبب ؟؟

الست بتاعه النهارده بقى .. افورت منها شويه .. ما اكتفتش بالصريخ و اللطم .. لا طلعت ف الشارع و رمت نفسها ف الارض و راحت قالعه الطرحه .. و صويت و لطيم و مش ماشيه من هنا !!

الناس يشيلوها م الارض ترمي نفسها زياده ..

لا اله الا الله بجد .. و حسبي الله و نعم الوكيل فيها هي بجد .. اللي بتعمله ده حرام و فضحت الدنيا وقومتني انا م النوم مفزوعه افتكرت حصل حاجه ف البيت .. و ف الاخر روحت ..

طب كان لازمته ايه ؟؟؟ خدتيه ف ايدك بقى تاني و انتي ماشيه ؟؟

و الله ما انا عارفه اخرت المستشفى دي ايه ؟؟

كده انا اللي حدخلها قريب :(

يا رب بكره المستشفى تديني اجازه و انام والنبي كام ساعه على بعض :(

اصعــــب قرار

اصعب قرار ..
طول الوقت .. طول ما البني ادم عايش .. بياخد قرارات .. ناس تفكر و تحسبها و تشوف اسوء الاحتمالات و بعدين تقرر ..
و ناس تانيه بتحب المجازفه و تقولك - فكر كتير .. تتعب كتير - لا انا قررت.. كده على طول ..
و ناس رائعه بصراحه .. ما بتقررش اصلا .. و راميه الحمل على غيرها يفكر و يقرر .. اللهم هيا بس تنفذ ..

دي الطرق اللي بيتاخد بيها القرار .. لكن القرار نفسه .. و الاصعب ..

هو انك تقرر تضحي .. تتنازل .. و احيانا تأذي نفسك عشان غيرك ..

زي اللي بيتبرع بكليته مثلا عشان ينقذ حد ..
اللي بيسيب دراسته عشان اخوه يتعلم .. لان الظروف الماديه ما تسمحش الاتنين يتعلموا ..
و غيره ..
او حتى بأساليب بسيطه .. انك تقرر تخفي حقيقه و تلبس نفسك موضوع كامل من اوله لاخره بكل عواقبه عشان ما توقعش الدنيا ف بعضها .. او تحافظ على عيله و تمشي المركب صح ..

ليه قرار صعب ؟؟

لانك للاسف الشديد عارف نتيجته كويس .. مدرك اخرته كويس .. صح او غلط مفيش حل تاني .. انك حتتأذي .. و حتخسر .. لكن حبك لغيرك و حبك للتضحيه عشانه قررته .. و انت ببتأذي و مضايق .. و حاسس انك ماشي عكس الطريق .. من هنا بتيجي الصعوبه ..

الامثله الحيه موجوده حوالينا طول الوقت .. معرفش اقولها كلها .. بس مـتأكده ان القرار بيبقى صعب :)

بس كده :D
ســـــــــــــــــلام

فين النضاره ؟

السلام عليكم ..
نظرا للسؤال المتكرر ليا ..
و هو .. ايه يا رنون .. فين النضاره ؟؟
اريد من موقعي هذا اخبار الجميع .. اني عملت العمليه و ما بقتش بفضل الله طبعا بلبس نضاره :)

الحمد لله بقيت انسان عادي :D

ســـــــــــــــــلام :)

نتيجتي

لا متقوليش ؟
لا بتهرجي ؟
مين ؟ و ازاي ؟؟
النمره غلط يا عماد ..
ده كان رد فعلي لما جتلي نتيجتي ..
بجـــــــــــــــد انا فرحانه جدا ..
الحمد لله جبت 84.4 % .. يعني امتياز الا سته من عشره ..
و ربنا انا مش مصدقه .. انا عملتها !
كان نفسي اجيب الترم ده كله امتياز و حطينه هدف و حققته (باستثناء مده دكتر مأمون جيد جدا و ده لاني تقريبا كتبت جافا بجد .. و ما كتبتش البطاطس اللي كان بقلهلنا دي) ..
اذا .. مفيش كلام يتقال غير ..
الحمــــــــــــــــــــــــد للـــــــــــــــــــــــــــــــه ..
سلام :D

سؤال .. نقاش

السلام عليكم ..
بعد غياب دام مش عارفه اد ايه كده و شويه ايام ..
عندي اسئله و نقاش كلمت نفسي فيه كتير و حبه اشوف الناس بتفكر ازاي فيه ؟
بدايه .. كنت راجعه م القاهره امبارح و انا راكبه لاقيت اب بيزعق لابنه عشان مش عارف عمل ايه ف الشنطه .. كلام فاضي يعني ..
ولقيت الابن مش طايق يعد جمب ابوه تاني و لا عايز يكلمه ..
الحركه دي فتحتلي باب اسئله كتـــــــــــــير .. بس مالهش علاقه بالموقف نفسه ..
الاسثله ::
هو ليه العلاقه بين الاباء و الابناء وصلت للمرحله دي ؟؟ ليه الاب ما عدش عنده استعداد و لا خلق و لا صبر و طوله بال يسمع ابنه عايز ايه .. بيفكر ازاي .. شايف ايه ؟؟

ليه ما عدش في الاعده بتاعه العصر لما العيله كلها بتتلم عشان تضحك و تهزر و كل واحد يحكي يومه كان ماشي ازاي و عمل ايه فيه ؟؟
فين كلمه محتاجاك يا بابا اكلم معاك ؟؟ قول يا ابني !

ليه الدفا و الامان الاسري اللي لو كل البلد واقفه لازقه فيك .. مش هتحسه غير و انت ف حضن ابوك بس .. اختقى ؟
ليه الاب بقى بيدور ف ساقيه و دوامه .. عشان مستقبل ابنه و شقه لبنته و و و .. لكن ف كل ده خمس دقايق لابنه مفيش ؟؟
باختصار .. عايزه اقول و مش عارفه اقول فين .. ان المسافه بعدت اوي بين الابن و ابوه و يمكن انا مركزه مع الاب لاسباب كتيره .. و لاني مش عارفه الام بتبقى موقفها ايه ف الموضوع ده .. عايزه اقول مش معنى ان الدنيا لاهيه الناس ان المشاعر تتهرس بالصوره دي
حيستفاد ايه الاب لما يلف ف الطاحونه و بعدين يبص وراه يلاقي ابنه مش عايزه .. مش عارفه .. مش فاهمه اصلا !
لازم جو الاسره يرجع تاني .. لازم الدفا و السعاده و الضحكه اللي بتطلع م القلب دي ترجع البيت تاني ..
اي نعم يمكن مش نافع مع اهالينا دلوقتي ..
لكن بقولها لكل اللي حيقرا البوست ده ... ولد او بنت .. لما تبقى ام و لما تبقى اب .. خصص وقت كافي من حياتك عشان تسمع ابنك و تفهمه ..
و ف داهيه اي حاجه ف الدنيا تبعدني عن ابني .. و تخليني اوصل لخمسين سنه و انا مش عارف هو اصلا بيفكر ازاي ؟؟
والله الواحد عنده كلام كتير نفسه يقوله لو قاله مش حيكفي ..
حسه اني عايزه اعمل مؤتمر اناقش ف الموضع ده :D
طيب قبل ما طموحي يزيد عن حده ..
اقولكوا سلام .. و يا ريت اللي عنده اجابه حتى لو طويله يشاركني بيها
ســـــــــــــــــلام ..

سعيده حبتين

السلام عليكم ...
هو بصرف النظر عن طعامه امتحان النهرده ..
و اني جالي حول رعاش ( ده غير الشلل الرعاش ) بسبب الارقام الجباره اللي ركبه فوق بعضها ..
و اني كمان مش عارفه هي تمانيه من عشره اكبر و لا الخمسه من عشره ..
و ان دكتر مأمون ( انا اسفه اني قلت دكتر ) بيكلم ف الماتشات و الخضار و احنا بنمتحن ..
و ان باشمهندسه نهى كعب ال (لامؤاخذه) الجزمه بتاعتها بيرن و هي رايحه جايه لما نفوخي ورم ..
الا اني سعيده !
اي والله انا سعيده .. بس لسبب اخر جدا و هو "بابا جي بكره "
ان شاء الله .. ان شاء الله .. اخيرا بابا راجع م السفر .. اي نعم هو شهر واحد ف السنه الي بشوفه فيه .. بس بقدر الامكان حستغله ..
ان شاء الله يعني :)
بس المشكله انه جاي مع اوباما !
ربنا يستر و يعدوك م المطار يا بابا .. لا يفتكروك ............... ما علينا :D
اصل بصراحه البلد دي ما حدش ضامن هي بتفكر ازاي ؟
:D
ســــــــــــــــــــلام

My Birthday

السلام عليكم ..

مممممم... كالعاده منذ ان ولدت و ترعرعت و نشأت في ... لا لا مش ده ... انا كده هحكي قصه كفاح شعب مصر بتاعت تانيه اعدادي :D

قصدي يعني اقول ان دايما من يوم ما اتولدت و انا عيد ميلادي ييجي ف وقت مش مناسب .. ايام امتحانات

يعني انا دخلت ع الدنيا ف وقت مش مناسب :D

انا مش عارفه اقول ايه بصراحه .. غير اني الحمد لله ف العشرين سنه اللي فاتو دول .. فهمت حاجات كتير اوي ف الدنيا .. شفت منها حاجات اكتر .. بحمد ربنا انه ادالي الصبر و القوه اني اعديها و اوصل للي انا فيه دلوقتي ( بشكل شخصي ) .. كمان بشكل علمي ( بس لسه معملتش اللي نفسي فيه :D )

حاجات كتـــــــــــــــــــــــــــــير اوي نفسي اعملها .. بعون الله ليا حقدر ان شاء الله ..

يلا كفـــــــــايه رغي بقى :)

بس ...

شكــــــــــــــــــــــــــرا .. لاحلى اصحاب عملنلي احلى شغل سواء بالمسج الساعه 12 :) او ع المنتدى الساعه 12 و شويه دقايق :D

شكــــــــــــــــــــــــرا .. لاحلى ايمان على البوست بتاعك :D

شكـــــــــــــــــــــــــرا .. لكل اللي كان ف نيته حاجه يعملهالي بس معرفش .. :D

ده كده اول عيد ميلاد ليا ف بلوجي :)

ســـــــــــــــــــلام :)

Exams Days

السلام عليكم ..

اليوم بدأ بأني صاحيه خايفه و قلقانه .. و يا ترى النهارده حيبقى عامل ازاي ؟ يا ترى حتمطر النهارده و لا كيلو العنب بقى بكام ؟؟
و جميع انماط الاسئله المنطقيه و الغير منطقيه ف دماغي ..

استغفرت ربنا و شغلت القرأن .. و ضربت النسكافيه و صليت عشان اهدى بقى ..
لكن اهدى ازاي و كريم ( اخويا ) ف البيت ..

ماسك ف ايده جمجمه .. و بيذاكر هو كمان عشان الامتحان بس anatomy بقى ... :)

و ف نفس الوقت مشغل "تامر حسني " .. كريم انت منين ماسك جماجم و عضم ف ايدك و منين نجم الجيل تامر ف ايدك برضه .. اظفر النقاش بنا على " خليكي ف اللي انتي فيه .. انتي مش عليكي امتحا ن ؟! "
بكل تواضع و عزه نفس .. سحبت نفسي و قلت انزل بقى لقضايا .. و قضى اخف من قضى ..
من 11 كنت ف الكليه انا و ايمان طبعا بنجري ورا بعض ف الورق و اي كارثه جديده نقراها نقلبها بكل فخر .. لان الوقت ازف ..

لكن بصراحه شديده .. الامتحان كان كويس الحمد لله .. طويل بس مش صعب .. ممل اه و كنت بنهج و انا بحل و حسه اني بطلع عماره 123 دور .. بس الحمد لله جـــــــــــــدا جت سليمه ..
و ربنا يستر ف الباقي ..
ســـــــــــــــلام بقى :)

============================================================

الساعه 11 و شويه دقايق..

خلصت مذاكره من ربعايه كده ..

مش فاكره الحقيقه حاجه من اللي اتذكرت قبل الربعايه ..

لكن ربنا يكرمنا بكره ..

و بكره بقى ابقى اكمل و اقول اللي حصل ..

انا خايفه اسيب البلوج اجي بكره مش طايقاه :D

لا لا .. ربنا حيسهل ان شاء الله ..

=====

الساعه 6 و شويه دقايق برضه ..

الامتحان كــــــــــــان حلو اوي الحمد لله ..

بس مزاجي مش اوي .. لكن اكيد برضه الحمد لله ..

الي اللقاء بقى مع ال CV !

=============================================================

الساعه سبعه و نص و شويه دقايق :)

الحمد لله جدا .. الامتحان كان حلو بس ..

IN DETAILS

بس كده المعلومه وصلت :D

و اخرتها بقى مع بتوع هندسه دول !

=============================================================

الساعه سبعه الا شويه دقايق ..

يا حلاوه و جمال و شقاوه امتحان النهارده ..

انا احوليت .. اي والله احوليت ..

بس ربنا ستر و حليت بعد ما احوليت ..

و كمان جبت اخري .. انا ما بقتش طايقه اصلا اجاوب .. بقيت بجاوب تخليص حق .. عشان اخلص

فاضل زلطه و نطلع بره .. يا رب !

studying effects

السلام عليكم ..

انا قلت لازم ادون اللحظه الجهنميه اللي انا فيها دلوقتي دي ..

انا و بلا فخر طول الترم بذاكر ايمدج و كمبيوتر فيجن ..

و قررت النهارده و بلا فخر برضه اني اذاكر HCI ..

انا غلطانه اصلا اني بقرر .. و غلطانه اني بذاكر .. و غلطانه اني دخلت الكليه من اساسه .. انا كنت اعدت ف البيت بالثانويه العامه شابه لطيفه زي الفل بكامل قوايا العقليه ..

و انا بذاكر حسه اني بطلع صهد من دماغي .. بل و حسه اني عبيطه .. مش بس كده بقيت بكلم نفسي و اضحك من غير سبب ..

الحمد لله انا كده خدت الجنسيه الحاسوباتيه ..

و حطلع منها ع التأهيل المهني عدل ..

انا كان لازم اكتب الكلمتين دول قبل ما اشيط !

التاني ‍!

كلاكيت تاني مره ..

النهارده كده انهينا امتحانات الشفوي وامتحان (واحد بس ) العملي .. الحمد لله ..
وشطبت على تاني حاجه ف اللسته ( بعز انا الشطب اوي )..

و حناخد اسبوع كامل بطوله و عرضه .. قبل المعركه الكبيره بين قوسين finall exams

ربنا يسترها معانا ..:)

ســـــــــــــلام .. و يا رب اللسته دي تتم على خير :D

الاول !

الحمد لله ...
حاسه اني قادره دلوقتي اخد نفس عميق براحه و سعاده ..
و ادي اول حاجه من اللسته اتشطبت ..

من غير تفاصيل كتير ..
اكتر لحظه حسيت اني فرحـــــــــانه اوي و بلمت.. لما اتقالنا " اخدتوا الفول مارك و لو في اكتر من الفول حديكوا "

سعيده بكل تفاصيل الكلمه ..

و يا رب عقبال الباقي ..

ســـــــــــلام ..:)

حنبدأ

طيب ..

يلا بقى عشان نبتدي .. و نشمر ..و ندخل بقلب جامد ع الايام الجايه دي ..

نبدأها بالامتحانات الشفوي ..

و تشطيبات مشروع ال HCI

امتحانات الفاينل بمختلف اشكالها و انواعها و اهم حاجه مفاجأتها ..

و برجوع بابا من السفران شاء الله بالسلامه.. و ده حوار تاني خالص لوحده :)..

و بالاجازه اللي مش حتبقى اجازه .. و حتبقى مطحنه بكميه الحاجات اللي عايزه اعملها و الكورسات و المذاكره اللي بحق و حقيقي مش الهذار اللي بنخده دلوقتي ده ..

اكيـــــــــــــــــد اني خايفه .. و اكيد شايله هم الحاجات دي و قلقانه ..

ده شعوري دلوقتي اللي يا رب لما اقرا الكلام ده بعدين اقول مالي كنت خايفه كده ليه ايه العبط ده ..:)

ربنا يعنا بجد ..

و يــــــــــــــــــا رب احقق اللي رسماه لنفسي و ما انامش ف السكه .. او اكسل .. او اي مؤثرات خارجيه تأثر عليا ..

ســــــــــــــــــــــــــــــــــــــــــــــــــــــــــــــــــــــــلام :)

كلمه شكر

السلام عليكم ..

البوست ده مخصوص لاحلى و اجمل صديقه و اخت ليا فعلا ... ايمــــــــــــــــــــان ..

من غير ما اقولك انا بحبك اد ايه .. انتي عارفه كويس ..

لكن انا عايزه اقولك ع الملاء... شكــــــــــــــــــراا ..

على حاجات كتيـــــــــــــــــــــــــر .. لكن اهمها و اللي خلتني اكتب البوست ده ..

وقوفك جمبي اليومين اللي فاتوا ..

لانهم يعتبروا من اصعب الايام اللي مرت عليا ..

رغم ان معظمها وقفتي معايا فيها ..

لكن دول بالذات كنت محتاجاكي اوي ..

و انتي ما ادتنيش فرصه حتى اقولك اني محتجاكي ..

و حتى لغايه النهارده ..

فضلتي برضه واخده بالك مني ..

و كنتي خايفه عليا اكتر ما انا خايفه على نفسي ..

ده انا كل ما اسرح تفتكري جرالي حاجه ..

تسألني " رنا انتي كويسه ؟"

مع اني والله كنت مركزه بس ف المحاضره

:D

انا فعلا بحبك اوي .. و عمري ما حعرف الاقي زيك بني ادمه كده ..

لازم اخلي بالي منك على فكره :)

ربنا ما يحرمني منك ابدا ..

The End !

اخيرااا..

اخيرا فيلم الامتحانات ده طلعله نهايه ..

اخيرا حيتشال من دور العرض ..

اخيرا الجمهور حيروح البيت ..

اخيرا حنااااام ..

الحمد لله بجد ان الاسبوع ده خلص ..

انا كنت بتعذب مش بمتحن ..

انام اربع ساعات بس او خمسه للامانه ..

طول الليل بحلم بحاجات مش منطقيه ..

و احلم بورق و اقلام .. و كأني ف مكتبه ..

المهم ربنا يجعل تعب الواحد بفايده ..

النهارده كمان كان يوم حلو ..

خلصنا " الانتحان " و انا و ايمان اعدنا نتمشى ف الكليه زي ما يكون علينا ندر ..

بعد ما خلصنا الطواف بتاعنا .. روحنا كوك دور ضربنا اتنين فاهيتا و بطاطس فرسكس و كوكا الحجم المبالغ فيه ..

لقينا لسه ف جيبنا قرشين كويسين .. نسكت بقى .. ابداا

اعدنا نتمشى و نتفرج على تشيرتات .. اللذيذ بقى ان احنا مش لاقيين حاجه تناسب الذوق الكلاسيك البسيط ..الدنيا كلها اصفر و اخضر و ازرق و فوشيا الخ الخ من الوان الربيع المبهجه ....

مفيش فايده يا ايمان ..

يعني خلاص يا رنا

شايفه حل تاني يا ايمان ؟

طب ما ده حلو يا رنا اهو

ده بتاع ولاد يا ايمان

الله بس حلو

يا حبيبتي احنا بنات ..انتي نسيتي ؟

طيب

اخيرا اقنعتها ..ان ده محل الولاد يا ايمان

..

عملنا طواف الوداع ف المشايه .. و ايمان فرهدت .. و انا كنت خارج نطاق الخدمه .. و بقينا ماشيين نعرج ف الشارع ..

فقررنا و ده طبعا قرار مش سهل علينا ان احنا كفايه بقى كده .. و يلا بينا نروح .. لاننا غالبا نسينا ان لينا بيت ..

بجد كان يوم حلو و لطيف كده ..

بجد كان اسبوع حرب ..

و اكيد اني عايزه انام اسبوع على الاقل من غير ما حد يقولي اني ف الكليه ..

يعني باختصار نفسي انام و اصحى الاقيني بنت خالي ..

اي حد تاني ..

مش ف حاسبات ..

انا حقوم انام بقى لحسن انا بقيت شايفه الحاجه الواحده بسبعه قدامي .. :

سلاااااام :D

غلط !

السلام عليكم ...

يمكن بقالي شويه ما دخلتش بس لاني كنت عايزه اكتب حاجه حساها اوي ...

و لازم اهدى شويه قبل ما اكتبها ..

وقعت ف الموضوع ده كذا مره .. و كل مره اقول معلش يمكن انا اتسرعت ف الحكم اكيد مش كده !..اصل مش معقول ؟ لا لا في حاجه غلط .... بس اخيرا قلت كفايه كده !

طبعا ما حدش فهم حاجه ... فحخش بقى ف الموضوع ... الموضوع باختصار شديد و من غير ما اعد اقول في ناس ... و ناس تانيه و حاجات من دي ..

كل الحكايه و اللي انا طلعت بيه .. بس متأخر شويه ..

انك ما ينفعش ابدا انك تكون صوره عن حد بناء على تجميع شويه كلام على شويه تصرفات شويه حركات .. و تقول ف الاخرهو ده .. و تدي لنفسك كل الاحقيه انك تبدع ف وصفه ...

مش حقول ان ساعتها الصوره حتبقى مش كامله .. لا !!

ده انت حتلاقي نفسك كونت صوره تانيه خالص عكس الواقع و حقيقه البني ادم نفسه .. سواء بالسلب او بالايجاب لكن ف حالتي انا ..

دايما متخيله اي حد ان شخص تمام .. و لو غلط ده عادي كلنا بنغلط .. و يا ما كونت افكار عن ناس .. طلعت كلها حاجات تانيه خالص

خلتني ابصلهم دلوقتي باستغراب ... و اقول باعلى صوت " مش ممكن .. مش معقول "

عايز تعرف شخص كويس .. عايز تكون له صوره سليمه الابعاد ... ادخل حياته ! قرب اوي ! افهم التفاصيل ! كلمه اكتر من مره ! شوفوا ف كل حلاته .. عصبي هادي سعيد حزين ..

بعد كده تقدر توصفه بكلمه واحده بالكتير ...

لكن من بعيد .. و تعمل موضوع و كلام و احتمال كمان تطلعه ملاك من السما ......... غلط ! غلط !

غلطه ... و كلنا جربناها ووقعنا فيها ... مش نفوق و نركز بقى ؟!

انا طولت .. كمان اكلمت بغل شويه ... بس والله انا حولت اهدى بكل الطرق و اكلم بعد كده

سلااااااام :)

انا و النضاره....

تعبت .. ماساه فعلا !!

انا و النضاره بقينا فعلا مش طايقين بعض ... انا بتلكك و اسيبها ف اي حته ف الشقه ... و هي تعاندني و ما الاقيهاش مكان ما انا سبتها...

ما هو مش مبرر ان عشان بابا دكتور و ماما ( الله يرحمها) كانت دكتوره و خالي وعمتي و اخويا ... الخ الخ دكاتره اني اتولد و ف وشي ( فترينه) بالوراثه !

و الله انا اتخنقت منها .. و حاسه انها عقبه بيني و بين العالم الخارجي ...
يا سلام مثلا لو لفيت عيني ف مكان بره العدسه .. ياااااه بحس ان النور اتقطع .. اضطر اظبط النضاره و اسنترها ( فعل center ) عشان يطلع المشهد ادامي كامل متكامل من غير خط اسود ادام عيني ( لان الفريم اسود )..

و المشكله كمان ... اني حسه ان وشي اتزحم ... في حاجات كتير ف وشي غير ملامحي ... انا اختفيت !

لا وزهقت منها حقيقي ... نفسي مره اعمل لنفسي مفاجأه و ابص ف اي حته ... الاقيني عارفه افرق بين البشر و رصيف الكليه...

لا و حاجه كمان ... ببقى بتفرج على التليفزيون و اقرر اني انام او اسند دماغي على الكنبه مثلا ... الاقي فجأه الحياه اتغيرت لانها طبعا بتتعوج من مكانها .. تخليني ما اعرفش افرق اذا كان التليفزيون اتقفل ... و لا انا نمت .. و لا العيب جاي منين ؟؟

طب و بعدين ... كل يوم حتخانق معاها كده ؟؟

سلااام .. لانها حاليا لازم تتلمع ... :(:(

اول بوست ... اهلا بيا !

احم احم ... بما انه اول بوست و اول تعامل بيني و بين البلوجات بصفه عامه .. فبالتأكيد حيكون في لخبطه كتير .. و اكيد انتوا مش حتسبوني تايهه كده ... فيا ريت لما ابهدل الدنيا الحقوني .. و هنيالك يا فاعل الخير و الثواب ..الخ الخ ( كفايه كده لحسن الناس قربت تعيط )

طبعا في سلام عليكم ناقصه من اول الكلام لذلك ............... السلام عليكم ........

طيب .. ايه يا رنا يا رب خير ايه اللي طققها ف دماغك فجأه و يبقالك بلوج زي الناس المحترمين ... لا و ايه كمان ؟؟ تكتبي فيها

سؤال وجيه !
ايمان ... طبعا عارفينها و ساكنه هنا جمبي ف بلوج قريبه .... كمان شارعين كده ..


ف ساعه تجلي كده النهارده قالتلي .... الا يا رنا ( بالفتحه ) انتي ليه مش بيبقالك بلوج و تخشي تكتبي فيها ..( بدل ما انا بصدعها هي بس فوجهه نظرها اني اخلي الاذيه عامه بدل ما تتشل هي لوحدها ).. و بعد نقاش دام طويلا ( لغايه ما الراجل بتاع السندوتشات خلص ).. شعشعتها ف دماغي .. فقلت انا كمان الا صحيح ( بنفس الفتحه )... ليه لا ؟؟ الحقيقه ده كان اسرع قرار خدته ف حياتي
داخله اجيب ساندوتش خرجت بحاجتين .. الاكل و ده المهم .. و قررت يبقالي بلوج .. الاكل و طلع تماااام .. بس البلوج ده بقى يرجعلكوا انتوا ..:D

طيب .. ده كده كان اول وبوست .. طويل و احتمال ممل .. بس انا قلت اني لسه جديده و انتوا حتسعدوني احسن وضعي

سلااااااام ... و الى اللقاء ف بوست جديد !