السلام عليكم ..
بعد غياب دام مش عارفه اد ايه كده و شويه ايام ..
عندي اسئله و نقاش كلمت نفسي فيه كتير و حبه اشوف الناس بتفكر ازاي فيه ؟
بدايه .. كنت راجعه م القاهره امبارح و انا راكبه لاقيت اب بيزعق لابنه عشان مش عارف عمل ايه ف الشنطه .. كلام فاضي يعني ..
ولقيت الابن مش طايق يعد جمب ابوه تاني و لا عايز يكلمه ..
الحركه دي فتحتلي باب اسئله كتـــــــــــــير .. بس مالهش علاقه بالموقف نفسه ..
الاسثله ::
هو ليه العلاقه بين الاباء و الابناء وصلت للمرحله دي ؟؟ ليه الاب ما عدش عنده استعداد و لا خلق و لا صبر و طوله بال يسمع ابنه عايز ايه .. بيفكر ازاي .. شايف ايه ؟؟
ليه ما عدش في الاعده بتاعه العصر لما العيله كلها بتتلم عشان تضحك و تهزر و كل واحد يحكي يومه كان ماشي ازاي و عمل ايه فيه ؟؟
فين كلمه محتاجاك يا بابا اكلم معاك ؟؟ قول يا ابني !
ليه الدفا و الامان الاسري اللي لو كل البلد واقفه لازقه فيك .. مش هتحسه غير و انت ف حضن ابوك بس .. اختقى ؟
ليه الاب بقى بيدور ف ساقيه و دوامه .. عشان مستقبل ابنه و شقه لبنته و و و .. لكن ف كل ده خمس دقايق لابنه مفيش ؟؟
باختصار .. عايزه اقول و مش عارفه اقول فين .. ان المسافه بعدت اوي بين الابن و ابوه و يمكن انا مركزه مع الاب لاسباب كتيره .. و لاني مش عارفه الام بتبقى موقفها ايه ف الموضوع ده .. عايزه اقول مش معنى ان الدنيا لاهيه الناس ان المشاعر تتهرس بالصوره دي
حيستفاد ايه الاب لما يلف ف الطاحونه و بعدين يبص وراه يلاقي ابنه مش عايزه .. مش عارفه .. مش فاهمه اصلا !
لازم جو الاسره يرجع تاني .. لازم الدفا و السعاده و الضحكه اللي بتطلع م القلب دي ترجع البيت تاني ..
اي نعم يمكن مش نافع مع اهالينا دلوقتي ..
لكن بقولها لكل اللي حيقرا البوست ده ... ولد او بنت .. لما تبقى ام و لما تبقى اب .. خصص وقت كافي من حياتك عشان تسمع ابنك و تفهمه ..
و ف داهيه اي حاجه ف الدنيا تبعدني عن ابني .. و تخليني اوصل لخمسين سنه و انا مش عارف هو اصلا بيفكر ازاي ؟؟
والله الواحد عنده كلام كتير نفسه يقوله لو قاله مش حيكفي ..
حسه اني عايزه اعمل مؤتمر اناقش ف الموضع ده :D
طيب قبل ما طموحي يزيد عن حده ..
اقولكوا سلام .. و يا ريت اللي عنده اجابه حتى لو طويله يشاركني بيها
ســـــــــــــــــلام ..
السبت، 20 يونيو 2009
سؤال .. نقاش
Posted by Rana at 11:19 ص
الاشتراك في:
تعليقات الرسالة (Atom)
8 comments:
السلام عليكم
بداية احب اقول اني عايش الموضوع ده دلوقتي
او بلاش دلوقتي ... من أول ما اتولدت لحد دلوقتي
و ربنا مايوريكو اللي انا بشوفه بجد ....
بس برضه هجاوبك على أسئلتك عشان تعرفي الموضوع كله بيبقى ماشي ازاي ...
1- "هو ليه العلاقه بين الاباء و الابناء وصلت للمرحله دي ؟؟ ليه الاب ما عدش عنده استعداد و لا خلق و لا صبر و طوله بال يسمع ابنه عايز ايه .. بيفكر ازاي .. شايف ايه ؟؟"
ده ببساطة يتلخص في ان الأب بيكون اصلا عصبي من الأول و معندوش استعداد يحسن علاقته مع حد (من الآخر بيكون مدلع من صغره و لما حد بيرفضله طلب بيبقى هيموته) ...
و طبعا كل أب بيحب ان ابنه يبقى أحسن منه
فلما يشوف ابنه بيعمل حاجة مش صح (والله و ساعات بتكون صح)
بيتنرفز و بيطلع كل غضبه عليه
و بالتالي
الإبن بيبتدي ميصارحش أبوه بكل حاجة بيعملها ... عشان ابوه مايتنرفزش عليه
و بالتالي برضه ابوه مابيعرفش هوا بيفكر ازاي!!
2-ليه ما عدش في الاعده بتاعه العصر لما العيله كلها بتتلم عشان تضحك و تهزر و كل واحد يحكي يومه كان ماشي ازاي و عمل ايه فيه ؟؟
فين كلمه محتاجاك يا بابا اكلم معاك ؟؟ قول يا ابني !
هوا عموما والدي مبيقعدش في مصر كتير ..
بس برضه .. لما بييجي في أجازة
بيبقى واخدها على انها مهمة لازم تخلص زي اي حاجة تانية
و بالتالي ... كل ما يبقى قاعد في وسطنا .. بتبقى دماغه مشغولة في حاجة تانية خالص
و لما نكلمه ميردش الا لو نبهناه بعدها اننا بنكلمه
3-ليه الدفا و الامان الاسري اللي لو كل البلد واقفه لازقه فيك .. مش هتحسه غير و انت ف حضن ابوك بس .. اختقى ؟
نظرا لإن الأب معندوش طولة بال اصلا زي ما حضرتك قلتي فوق!!
4-ليه الاب بقى بيدور ف ساقيه و دوامه .. عشان مستقبل ابنه و شقه لبنته و و و .. لكن ف كل ده خمس دقايق لابنه مفيش ؟؟
ده بقى السؤال اللي انا مش متأكد اني عارف اجابته
بس تقريبا مش أنا الوحيد اللي مش عارف اجابته
حضرتك لو دخلتي بلوج أختي هتلاقيها بتسأل نفسها برضه!!
http://nee-din-isolation.blogspot.com/2009/06/i-just-need-hug-dad.html
5- موقف الأم بقى ..
ده بصراحة اللي بيخلي الواحد يهدى و يستمر في الحياة ولا اكن حاجة حصلت
الأم... بجد معتقدش ان في احنّ من كدا ولا احسن من كدا في الدنيا!!
طولت أنا عارف بس حضرتك اللي جبتيه لنفسك :D
"اقولكوا سلام .. و يا ريت اللي عنده اجابه حتى لو طويله يشاركني بيها"
:)
شكرا
سلام
انا عندى اجابة.........
اظن ليها علاقة بالموضوع
حتى لو كانت غامضة شوية او شويتين
!
فى ناس عندهم اب وام حلوييييين اوى وزى العسل على قلبهم انما فى مشكلة فيهم هما نفسهم
==========
فى ناس زينا كدا عندهم مشكلة ف حاجة
يا اما الاب يا اما الام
المشكلة حنلاقى لو الاب عصبى ومش بيدى وقت لابنة ومش بنعرف نتكلم معاه
حنلاقى الام من ناحية تانية بتهدى وتوزن الامور
===
فى الام بتبقى مشغولة او (اولادها ) مش اهم حاجة ف حياتها او ممكن تكون عاوزة كل حاجة بالاضافة لاولادها او فيها اى عيب ما
نلاقى الاب فى الحالة دى هوا اللى طيب وهوا اللى ممكن يضحى عشان ولادة
===========
ممكن نلاقى حاجة تالتة
الاب والام (للاسف) مهماش فاهمنا خالص والواحد حاسس ان هما ف وادى والابن ف وادى تانى
هنا نلاقى ان ربنا معوضة ف حجات تانية
انه انسان محترم وعايش حياه كويسة وكلية كويسة وربنا راضى عنة
ويعوضة فى المستقبل بزوجة كويسة
==============================
شايفين كل الحجات دى؟!!
انا عندى حاجة من الحالات اللى فوق دول
انا واحدة منهم.......
وبجاوب على نفسى السؤال اللى محيركم
(لية؟!) بجاوب ان دى حكمة ربنا
ومليش الحق انى اسال لية
مدام فية حجات تانية تعوضنى
مهو انا ببص ان فى ناس اكيد عندها مشكلة اكبر!!
وبرضة بقول ان ربنا حيعوضنى ان شاء الله
والله مش كلام وبس ...
انما حقيقة اما بشوف ناس بقول الحمد لله على حالى واحمدوا ربكم فعلا ان فى حد يعوض ولو صديق...
ونصيحة محدش يفكر ف اجابة للسؤال
لان مش حتلاقوا
لان فى الاصل مش من حقنا نسال
امممممممم
أسئلة صعبة
بس زي ما بسمة قالت دي إرادة ربنا
يعني أنا برضه نظام شغل بابا ومع أنه كان هنا فى المنصورة بس كان بعيد
وطبعا فيه أيام طوارئ دي ممكن مااشوفش بابا باليوم واليومين وهنا فى نفس البيت !!!
وطبعا إختراع إجازة ده عند الناس كلها بس فى شغل بابا الإجازة == طوااارئ
يعني العيد طوارئ أى إجازة فيه تجمهر للناس طوارئ طبعا أيام الإنتخابات والحاجات دي ماتسألوش عنها خاااااالص
بس مينفعش بابا يغير شغله ومينفعش برضه أغير طريقة تفكيره
بس أنا ممكن أعود نفسي على ده
نيجي لماما بقي طبعا هى بتعوض جااامد يعني وخصوصا نظام أني البنت الوحيدة والصغيرة جو تاني
بس نظام بقي ليه محدش بيفهم ابنه أو عنده وقت أعتقد ده أصلا إختلاف جيل عن جيل وطبيعي أنه يحصل
ويعني كمان الرجال كلهم بيعتقدوا أن الحب بيظهر أكتر فى الفعل مش الكلام
أنه يتعب عشان يجيب فلوس يعني بيحبك
لكن أنه يقعد يتكلم معاك مش بتعبر عندهم عن الحب
بس عامة ربنا دائما بيعوض الواحد بحاجات تانية
يعني عندي ماما وعندي أصحابي والحمد لله حلوين قوي :)
وربنا معانا كلنا ويبقي دائما فيه حاجة تعوض
سلااام يا رنون باشا :)
ياه يارنا عليكى بجد ..
كللللل "ليه" دا يارنا .. بيبقى ناتج يااما من طبيعة الاب نفسه انه عصبى أو انه دايما بعيد عن ولاده فبالتالى هيفهم منين هما بيفكروا ف ايه؟!!
ولو جم يقولوا حاجة مثلا .. لسا هيفهموه بس ..اسمعنى للاخر يا بابا.. خلاص الكلام انتهى يقوم مزعق يخليكى تتكتمى خالص ولو طال يضربك هيضربك (ده بابا) + انك لو اييه حتى مش هتقوليله تانى .. مع انه والله لو سمع للاخر ممكن يقتنع
فى حاجة كمان من الاساليب اللى بجد مبحبهاش خاااالص .. تقوليله حاجة ..يقولك لأ ..طب ليه .. هو كدا ونبرة الصوت أصلا تخليكى تتكتمى خالص + تتعقدى ف عيشتك اكتر
بجد الاسلوب دا مينفعش خااااالص ... وفعلا انا متأكدةة ان محدش من الابهات فاهم ابنه او بنته بيفكروا ف ايه أو ممكن تبقى دى الام برضوا (بس نادر دى الحمدلله)
وممكن السبب كمان ..انهم واخدين على اسلوب تربية من زماان اللى هما اتربوا عليه .. فعايزينا نبقى كدااا ..نعمل كل حاجة زى ماهما عملوها ايامهم ..غير كدا يبقى لأ وبدون سبب :|
ففعلا الاسلوب دا لااازم يتغير فى المستقبل ان شاء الله :)
سلاااام :*
ازيك يارورو :d
بصى هواهم حاجه ان الانسان يتقبل الواقع لان معظم الناس مش هتقدر تغيره وده لان اكتر الكبار متاكدين ان كل حاجه بيعملوها هى الصح ..
بس انا متاكده ان ربنا بيعوضها فى حاجه تانيه واشخاص تانيين
وياريت ميزعلوش من اهلهم ..
كان عندى مدرس فى الثانويه العامه قالنا نصيحه: لو زعلت من حد عزيز عليك اوى ومثلا وصلت لعدم الكلام بينكو, تخيل لو ان الشخص ده اختفى للابد من حياتك بكره ساعتها هتعمل ايه؟؟؟
اهم حاجه بقى اننا نتعلم من اللى بيحصل علشان فعلا نعرف نربى اولادنا صح
معلش طولت بس الموضوع بجد شدنى
سلامز
نسيت اقول اهم حاجه :اننا بجد لازم نحمد ربنا انهم موجودين فى حياتنا سواء هما او واحد منهم فدى بجد اكبر نعمه ونتذكر قوله تعالى:((وَقَضَى رَبُّكَ أَلاَّ تَعْبُدُواْ إِلاَّ إِيَّاهُ
وَبِالْوَالِدَيْنِ إِحْسَاناً إِمَّا يَبْلُغَنَّ عِندَكَ الْكِبَرَ
أَحَدُهُمَا أَوْ كِلاَهُمَا فَلاَ تَقُل لَّهُمَا أُفٍّ وَلاَ
تَنْهَرْهُمَا وَقُل لَّهُمَا قَوْلاً كَرِيماً {23} وَاخْفِضْ لَهُمَا
جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا
رَبَّيَانِي صَغِيراً )).
ممكن الخص الاجابة علي الاسئلة دي كلها في ان
الاب طول اليوم بيجري علي لقمة العيش و الاب دالوئتي في اغلب الاحيان -اسف في اللفظ- مربوط في ساقيا و اقتصر دورة علي انة يجيب فلوس !!
و من النقطة دي المجتمع بيفترض ان دة هو الدور الاساسي و الوحيد اللي المفروض يئدية
وبننسا كتير واجباتة كـ اب و حقوق ولادة علية اللي مهما كانت كمية الفلوس اللي هيجبها مش هتعوضهم حنانة المفقود
كل الكلام دة طبعا فية استثنائات بس بقت قليله جدا علي ما اعتقد و دى رئي الشخصي
كلام جميل يا رنا واسئله صعبه
--------
انا عن نفسى بابا كان بعيد عنى 13 سنه تخيلوا كنت بشوفه شهر بس فى السنه وطبعا الشهر مش كتير انك تقرب من ابوك وتفهمه وهو يفهمك
-----
بابا نزل نهائى وانا عندى تقريبا 17 سنه .. يااااه وكان دايما انا وهو مختلفين فى وجهات النظر ومكنش فى تفاهم نهائى خاصه انا واخويا الاصغر منى نظرا لاننا قعدنا اكتر منتعاملش معاه زى باقى اخواتنا وكانت بتحصل مشاحنات كتيير وعياط بقى والكلام ده ..
بس صدقونى مهما كان الاب قاسى او مفيش تفاهم معاه اكيد فى ابواب كتير اووى تعرف تدخله منها بس الذكى هو اللى ينتهز الفرصه دى .
يعنى احنا عاوزينهم يسمعونا ويتفاهموا معانا .. حد جرب قبل كده يعد معاه ويتكلم معاه ويسأله عن ايام زمان ايام شبابه هو وكان بيعمل ايه ويعرف تفكيرهم ايه ايامها ويتناقش فى الكلام
وتعد تقارن انت قدام باباك عن ايامه وايامك وتقوله اه يا بابا فعلا الزمن اتغير وتحاول توصله اللى مش واصله وطريقة تفكيرك ازاى اكتتتر حاجه الاباء بيحبوها وخصوصا لما يكبروا فى السن هو تذكر ماضيه ويحكى عن نفسه اكيد كلنا بنكون تعبانين وبنحس اوقات بملل علشان الزمن مختلف والعادات كانت غريبه
بس زى ماانته عاوزه يسمعك اسمعه انت كمان واساله فى وجهه نظره مش لازم تنفذها بس يبقى فى حوار بينكم وابدأ واحده واحده وصدقونى هيتيغير كتير شوفوا اكتر حاجه بيحبها ولو كبايه شاى واعملها له واقعد معاه وعامله برحمه وحنان وهتلاقيه انسان تانى خاااالص وهيتغير معاك بجد .
ده اللى انا توصلتله حقيقى وبدأ بابا يفهمنى الحمد لله ويعرف ان عصرنا مختلف عنهم رغم ان فى بعض ثغرات بس بحاول اقنعه فى الاخر ودلوقتى استسلم وبيقولى انا عارف انك هتغلبينى :D
صدقونى يا جماعه زى ما بتفكروا انهم مش قريبين منكم وانتم محتاجينهم هما محتاجنكم اكتر منكم قربوا منهم اكتر وكل الامور هتتصلح ان شاء الله .
واكيد لازم ناخد بالنا بقى احنا من ولادنا ويبقى اسلوبنا احنا مختلف :)
ربنا يوفقنا جميعا
سلام عليكم
إرسال تعليق