نافوخي ورم !!

السلام عليكم ..

كل يوم الموقف بيزداد روعه عند بيتنا .. و كل يوم يتثبتلي اني ان شاء الله حموت بالضغط ..
انا قبل كده قلت اننا ساكنين ادام مستشفى و للعلم هي مستشفى الجامعه و بالتالي بنصحى كل يوم على صوت صريخ و خلافه و نظرا لانى الصبح غالبا ببقى ف الكليه و كده.. فبترحم الى حد ما ..
لكن يوم الجمعه هو يوم الزياره الرسمي .. و يوم الاجازه الرسمي برضه عندي .. فبالتالي لا مفر من سماع الخناقات و الصريخ و ال " يالهوي " اليوميه ..

الجديد بقى .. ان العماره بتاعتنا نفسها .. قررت تشارك ف حمله رفع الضغط التي شنت ( بضم الشين ) عليا ..
و بالتالي قررت تجديد الاسانسير و اعدت اسبوعين بصحى على صوت خبط و رزع و طوب و هبل اسود و النداء الدائم على " يا محـــــــــــمد يا واد يا محــــــــــــــــــمد " و لكن محمد دائما و ابدا .. ولا بيعبرهم .. و لكن الاصرار و العزيمه خلتهم حتى لو محمد ما ردش .. والله العظيم لنادي كمان و كمان .. و يستمر النداء بلا جدوى

و اخيرا لما ربنا كرمنا و جددنا الاسانسير و اخيرا ايضا رد محــــــــمد عليهم .. عملنا نغمه حلوه اوي للاسانسير بحيث كل ما حد يطلع يرن .. و اما يفتح الباب يرن و اما ينزل يرن .. رنات مجسمه و اخر حلاوه ..

المشكله كمان ان العماره عندنا كلها شركات و تقريبا تلات اربع شقق بس اللي سكنه من ضمنهم بتنا .. لذلك الناس طالعه نازله كتـــــــير
و بمعدل مرتين ف الدقيقه بسمع الرنه الرائــــــــــعه دي لان المطبخ و الحمام شبابكهم بتطل على المسقط الي الاسانسير بيطل عليه ..

حد بقى يديــــــــــــــــني عقلهD:

عدنــــــــا ..

السلام عليكم ..
يا لهــــــــــــــــــــــــــــــــــوي بقــــــــــــــــــــى ..
معلش بس اصلي كنت عايزه اصرخ و ماسكه نفسي طول المده اللي فاتت ..
انا اكيـــد مش حكلم على اخر امتحان ده .. الكلام فيه محروق خلاص ..
كمان مش حكلم عن الايام اللي فاتت .. لاني مش عايزه افتكرها .. انا خدت كميه ادويه ف فتره الامتحانات دي تفتح صيدليه ..

امممممممم .. ده تقريبا كده مش لاقيه حاجه اكلم فيها :D

بس انا واحشني بلوجي اوي ..

و اوضتي واحشاني .. و شبشبي الاخضر واحشني .. و مخدتي و ملايه السرير اللي عليها ميكي واحشاني .. انا حسه اني كت ف العراق و لسه راجعه ..

كمان عايزه اقول اني بحب ايمان اوي .. و اني مقدرش استغنى عنها .. لانها اختي .. مفيش حاجه ف حياتي ما تعرفهاش .. فاهماني اكتر من نفسي .. و جدعه .. يا رب ما تبعد عني ابداا

كمان في ناس بحبها .. عايزه اقولها اني بحبها اوي .. اوي يعني ..

كمان عايزه اشتغل ف مشروع التخرج بقى ..

هي مالها قلبت معايا برنامج اطلب و اتمنى كده ليه ؟ بس اصلي لازم اكتب حاجه و خلاص :)

لا .. انا كده بقيت خطر ع البلوج .. اقوم انام بقى .. اسـتــــــــــــــــــــــــــــــــــــــــــراحه

تصبحوا على خير .. زواري اللي مستحملني :D

ابتسموا بقى

السلام عليكم ..

اخيرا موضوع ملوش علاقه بالكليه ..
الابتسامه دي اجمل و ارق و اسرع وسيله تواصل مع اللي قدامك ..

تصحى الصبح تقابل صحابك بابتسامه .. و يقابلوك برضه بابتسامه .. تحس ان يومك اتظبط .. و ان الدنيا لسه بخير
تخرج م الامتحان و انت مبتسم ايا كان ضرب النار اللي حصل جوه .. بس انت خارج بابتسامه

تمشي ف الشارع في ابتسامه بسيطه على وشك .. مش ماشي تضحك زي العبيط .. لا .. بس في رضى نفسى انت حاسس و محسس اللي حواليك بيه ..

و انت بتكلم اي حد ف اي حاجه بتكلمه ووشك مستوي مفرود كده و فيه حيويه .. بمجرد ابتسامه

ده حتى الابتسامه ممكن تكون رد كافي اوي على كلام كتير ..

و ممكن تصلح موقف كامل على بعضه من اوله لاخره ..

كمان مهمه اوي ف الشات و المسج .. لانها ممكن تغير معنى كلام كتير لو بس اتحطيت ف اخر الجمله ..

انا شخصيا .. في ناس لو ضحكت ف وشي الصبح بس ابتسمت من غير ولا حرف .. بتخلي يومي كله يتغير ترتيبه .. وببقى فرحانه اوي ..

و النبي يا اخوانه .. يا كل واحد حيقرا البوست ده .. خلي ابتسامه دايما مرسومه على وشك .. و انا عارفه و متأكده ان العيشه و الاوضاع اللي حوالينا تخلينا نمشي بنلطم مش مبتسمين .. بس هي فعلا مش ناقصه .. و مش طالبه رسمه الغضب و الارف اللي شايفاها على وشوش كل الناس طول ما انا ماشيه .. فكوها شويه .. ده احنا لسه عايشين والله

يلا بقى سلام .. و ليكم مني احلى ابتسامه :)

سكشن بحري

السلام عليكم ..
والله انا بدأت احس ان البلوج معمول عشان المصايب النفسيه اللي بتحصلنا ف الكليه دي .. و مش عارفه الحقيقه بعد الكليه ان شاء الله ان شاء الله ما تخلص انا حكتب ايه .. بس هي تخلص بقى و ان شا الله بعدها اكتب عن ارتفاع اسعار البرتقال ابو سره و تأثير ذلك على نفسيه الشعب المصري ..

النهارده كان سكشن بشمهندسه عزيزه على قلبي جدا يعني منزلتها ف قلبي زي منزله الكبيره كده بالظبط .. حاولت كتير اعبرلها و اصرحلها بمشاعري الرقيقه جدا اوي دي من ناحيتها .. بكل الوسائل ..لكن البعيد ما بيحسش

و بدأت تشرح ..
و بدأت انا ابني اسطول المراكب ده ..




طبعا لان ايمان بتكن لنفس المعيده نفس المشاعر اللي انا بكنهلها بالظبط .. اشتركت معايا ف عمل المراكب دي .. و كل واحد عمل مراكب على اد حجمه .. و بالتالي انا عملت مراكب كبيره . و ايمان عملت مراكب ضئيله ( سوري يا ايمان :D )

ابص عليها ..الاقيها لسه ربنا مديها القوه و العافيه و مستمره ف الشرح ..
غيرت اتجاه الاسطول ..







حتى القبطان جبته .. و الله ما بخلت




وابحرنا ف عالم المجهول مع البشمهندسه الرائعه .. لا ! بل الاكثر من رائعه .. بشمهندسه نهى .. اللهم اما صلي ع النبي يعني ..

المره الجايه اعملها فريق الكشافه ان شاء الله ..

؟؟

هو في ايه السنه دي بالظبط ؟؟

my status

مساء الفل ..

حاله غريبه اللي انا فيها حاليا دي ..

اولا .. شايفه من كل حاجه سته تقريبا ..

ثانيا .. لا مبالاه ..اخويا كان اعد يحكي ف موضوع الله اعلم كان ايه .. و بعد ما خلص كلام بيقولي ايه رأيك .. يلاقي ادامه واحده فاتحه بقها و تقوله .. هــــــــــــــــــــــــــــــــــــاااا ؟

ثالثا .. حسه اني همدانه لكن مش عايزه انام ..عايزه اتنح

رابعا ..انا يا بردانه يا اما حرانه .... او جعانه ؟

خامسا .. ايه التوبك ده .. اي كلام بيتقال :)

طيب كفايه كده النهارده .. سلام !

finally ..

السلام عليكم ..

الحمد لله ايــــــــــــــــــــــــام فظيعه و عدت ..

زي اي محنـــــــــــه و بتعدي ..

بس امتحان النهارده خالاني و لاول مره اعيـــط من حاجه تخص الكليه (كدراسه) .. يجيلي ضغط و سكر و قلب منها ماشي .. لكن النهارده عيط فعلا م الامتحان و مكنتش حتى طايقه اكلم حد ..

حسبي الله و نعم الوكيل .. و يـــــــــــــــــــــــــــــــــــــــــــــــــــــــــــا رب اخلص بقى م الكليه دي بكل حاجه فيها !