كلمتين كده

السلام عليكم ..

اولا .. الحمد لله بالنسبه للبوست اللي فات الواحد حالته النفسيه بتتحسن بمرور الوقت .. و ربنا يستر ..

ثانيا .. النهارده دارت بيني و بين بابا منافشه .. مش مناقشه بالظبط هو انا قلت كلمتين ف اول المكالمه بعد كده الكلام كله منه الا لو انا حبيت اضيف حاجه ..

عايزه اقول .. ان مفيش حد ممكن يحبك ف الدنيا دي اد اهلك ..

مفيش حد ممكن ينصحك بقلب و مش عايز منك اي مقابل غير انك تبقى احسن و افضل منه غير اهلك ..

ما بيكلمكش ف حاجه تخصك غير عشانك .. مش بينصحك بحاجه غير عشان تنفع بيها نفسك ..

لو حكتلوا مصايب بتعملها .. متبقاش خايف تقل من نظره او يسيبك او يبصلك بصه ما تعجبكش .. تلاقيه فجأه بيقولك ده انا ابوك يا عبيط .. :D ( ممكن ما يقولش يا عبيط .. عادي جدا )

اهلك .. و بالتحديد الاب و الام .. هو اللي كل مشاعرهم بجد .. مش متغيره .. صادقه .. مطلقه .. هدفها الاول و الاخير انك تكون احسن واحد على وش الدنيا و احسن منه كمان ..

كام نصيحه كده ..

• احمد ربنا سبحانه و تعالى على النعمه دي .. و حافظ عليها بقى .. و خليهم دايما راضيين عنك ..
• قوم حالا بوس ايد ابوك و امك و قلهم ربنا يخليكوا ليا ..
• ما تكسفش ابدا منهم .. خليك صريح معاهم و لو عايز نصيحه مكتسبه من خبره سنين و تكون م القلب و مفيش وراها اي اغراض تانيه .. عليك و عليهم :D
• بس ..

ســــــلام ..

رساله مني .. ليا

لما تبقى متعلق بحاجه اوي ..

اما تطلع تجري وراها عشان توصلها ..

اما تحس انك مش عارف تمشي ف الدنيا مفتح و شايف ادامك غير بوجودها ..

اما تشقلب ف الجو عشان عايزها ..

اما تدعي ربنا ليل و نهار لمده سنين انها تتم ..

و ف الاخر تختـــــــــــــــــــفي .. وتتحطم .. و تنتهي ..

اظن بـــــــــقى مفروض تفهم و من زمـــــــــــــــــان .. ان ربنا سبحانه و تعالى مش عايزها ليك .. و الخير مش فيها !!

يا رب قويـــــــــــني ..

حلم ع الماشي

السلام عليكم ..

الموضوع مش زي ما تخيلتوه .. حلم و طموح و كلام من ده ..

لا ده حلم بجد حلمته و انا نايمه .. و انا اللي زيي اصلا النوم خطر عليه .. لاني بطلع كابتي كله ف احلامي و ف الاخر اصحى مخضوضه ..

بس ده حلم كوميدي شويه .. في شويه حاجات كده ف اول الحلم ليها علاقه بحياتي انا و ملهاش علاقه بموضوعنا ف حنطنشها :D

نيجي للجزء المهم .. حلمت اني جايه الكليه و ايمان جايه بتقولي انتي كنتي فين و كده ؟ و بتقولي لسته المشاريع نزلت انتي ما بعتيهاش ليا ليه ( ده طبعا لان اخر حاجه قبل ما انام قريت لسته المشاريع بتاعه التخرج بتاعتنا و شتمتها و نمت :D ) فقلتلها انا بعتلك اللينك بتاعها و الله و دلوقتي نسأل و نتأكد .. كان معانا اتنين صحابنا قالولنا احنا حجزنا تذكره عشان نسأل ( ف الحلم السؤال للشؤون بقينا بنحجزله تذكره و نقف ف تابور عشان نسأل سؤال و ميعاد الاسئله من الساعه 2 لغايه 3 ) و اسمنا اخر اسم ف الطابور فبقولها خلاص يا ايمان حجزولنا معاهم اهم .. دلوقتي نسأل و نفهم ..

اه اه اه .. بجد والله سبحان الله .. عقلي الباطن مسيطر عليه فكره واحده ..ان الكليه دي مفتريه و بتذلنا و حطلع روحنا باذن الله ( قال يعني هي لسه مطلعتش) ..

الموضوع مبقاش هزار ده انا فعلا مخي لسع !

النهارده .. بعد ما خلصنا و مشينا و ركبت التاكسي انا و ايمان و بطلع بقى الفلوس عشان احاسب .. اتفاجأت اني نسيت موبايلي ف المعمل !!

و الله الراجل بتاع التاكسي الله يكرمه ( بعد ما حمد ربنا و باس ايده وش و دهر انه هو بعقله ) راح مفرمل لوحده كده فجأه من غير ما اقوله حاجه.. و رحت نازله جري انا و ايمان راجعه الكليه تاني ..

انا فعلا كنت بكامل قوايا العقليه قبل ما ادخل الكليه.. كنت كويسه كده و مركزه ..بابا ما بقاش يقولي غير ركزي ..صحصحي .. بصي يا بنتي ادامك ..دايما انا ماشيه و دماغي ف كوكب تاني :D

دلوقتي بقيت عبره ف العيله .. يعني اللي مش حيشرب اللبن قبل ما ينام يا ولاد حيبقى شبه رنا كده .. ( دعــــــابه :D )

طب و بعدين .. و انا صاحيه بتعذب منها و و انا نايمه بقطعلها تذاكر .. اروح فين ؟؟؟ :D

يلا ســـــــلام ..

مش لاقيالي عنوان D:

السلام عليكم ..

طبعا هي مشكله .. لكن حصيغها ف اطار كوميدي للتخفيف من حده الكارثه الاجتماعيه اللي البلد دي بقت فيها ..

زماااان ايام ما كنا اطفال .. كان بابا و ماما يخلونا لما نلعب .. نلعب مع بنات صحابنا ( بتكلم عليا كبنت يعني :D) و منلعبش مع ولاد و لما كنا نقول ليه ؟ كانت الاجابه كلمه واحده عيـــــــــب .. و الموضوع خلص ..

كبرنا و درسنا دين .. و عرفنا يعني ايه حلال و حرام .. بقى فيه تربيه و قيم و عادات و فهمنا معنى كلمه عيب بكل ابعادها ..

حاااليا .. كل المبادئ اتغيرت .. كل العادات اداست بال... مه , و ما شاء الله ما شاء الله بقى في عجب بيحصل حوالينا ..

و ما شاء الله ما شاء الله بقى الحياه هيصه .. و البنات و الولاد لوكشه واحده مفيش فرق .. و هلم جر

بقى في صاحبي و صاحبتي .. قسم بالله انا لو دفعولي فلوس و قالولي قولي اللفظ ده ما ادر اقوله ..

بقيت بسمعها اكتر من سلام عليكم .. بقى تيتو و ميزو و فوفو و كوكو و كل اسماء اللبان دي بقت بتتقال عادي جدا قدام مامي و بابي عادي جدا ..

ايوه يا مامي انا مع ميزو ف النادي !!!

ميزو ف النادي ؟؟ ده على اساس ان ميزو ده ابن اختك .. و الداهيه الكبيره الاقي مامي عادي .. و ما تتاخريش !

اموت نفسي انا بقى و لا ارمي نفسي م التاكسي ..

بلاش .. و الله و دي قدام عيني ف الجامعه لدرجه اني شهقت و تنحت ليهم ف الجامعه لما كنت حضرب ..

رفعت و منال (اسماء مستعاره ..) تحت الشجره يا وهيبه

..

بعدين رفعت الله يكرموا مطرح ما هو اعد كان لابس كاب و يظهر محرره .. منال صعب عليها قامت شايله الكاب و عدلتله شعره ( لان طبعا الكاب بوظ السابايكي ) .. طبعا رفعت اضايق لان منال الرخمه الوحشه بوظت ستايله ..

راح ضاربها ف كتفها .. راحت ضارباه ف كتفه راحت ايمه واقفه راح مديها بالشلوت !

هنا انا شهقت يا رمضان ..

كــــــــــــــــــاتير والله , كــــــــــــاتير عليا اللي بيحصل ده ..

امبارح برضه كنت ف الشارع بشتري حاجه للبيت كأي مواطنه مصريه طبيعيه عندها اربع كور دم حمرا ف دمها ..

و راجعه حرانه و ارفانه .. و ماشيه و الاقي زيزو و فوفو و عبد الجليل الخ الخ الخ .. كل ملموم و واقف مش معروفلهم ملامح من كتر

العبط اللي بيحصل .. و ده بيخبط دي و دي تضرب ده و ضحك و هزار و انا معديه جمبهم عايزه اديهم بالكيس البالاستيك على نفوخهم ..

انا خلاص ارفت م الشارع و م البشر دي .. و حموت و افهم سؤال واحد بس .. هي لما ترجع البيت و تخش على ماما و بابا اللي اكيد حيبقوا مامي و بابي .. بتقولهم ايه ؟؟ بلاش بتنام عادي كده و ضميرها فله ازاي ؟؟ طب مش بتحس بقلق او بحاجه غلط من باب ختى كميه الناس اللي بتكلمهم و الله اعلم مين بيقول على مين ايه ؟؟ بأي بتنجان ف البطاطس ؟؟

طبعا انا بحكي بهزار للفضفضه .. لكن هي كارثه و الله اعلم حتروح بينا لفين ؟

ســــــــلام ..

خلصت 1

السلام عليكم ..

اليوم بحمد الله اتممت كورس CCNA بكل تفاصيله .. سبق و ذكرت ايمان روعه الكورس و المكان ف البلوج بتاعتها :D
بجد انا حسه براحه نفسيه اني انجزت حاجه مهمه و كان نفسي فيها من زمان .. فاضل باذن الله الامتحان لكن حصبر شويه لما اذاكر كويــــــــــــــس جدا ..
من غير ما اطول .. انا سعيده .. و بجد فعلا اروع احساس ممكن تحسه لما تتعب عشان هدف .. و تحققه ف الاخر ..
يلا انا قلت اسجل حاجه خلصت .. و من بكره ان شاء الله حنبدأ التدريب .. الله المستعان ..
ســــــــلام زواري الكرام :)

اصطبحنا و اصطبح الملك لله

ما كنا نايمين ..

والله حرام ..

للاسف المبالغ فيه .. بيتنا موقعه استراتيجي جـــــــدا ..

ساكنين قدام مستشفى !

طب و ايه يعني ؟ .. و ايه يعني ؟؟ لا يعني كتــــــــــير .. ساكن قدام مستشفى يعني لازم تصحى كل يوم على صوت " يــــــــــــــا لهوي , يا خبر اســــــــــــود , سبتني لمين بعدك , ده لسه عريــــــــــــس , لا ! حــــــــــرام , ربنا ينتقم منكـــــوا " ..

كل يوم او بدون مبالغه يعني يوم و يوم .. اصحى على اصوات الصريخ دي ..

واحد مات تلتف العيله كلها حوالين بعض و يبدأ النواح و الصريخ ..

السؤال بقى .. هو انتي لما تعملي كده هو حيرجع تاني ؟ و لا لما تقولي ربا ينتقم منكوا ده على اساس انهم السبب ؟؟

الست بتاعه النهارده بقى .. افورت منها شويه .. ما اكتفتش بالصريخ و اللطم .. لا طلعت ف الشارع و رمت نفسها ف الارض و راحت قالعه الطرحه .. و صويت و لطيم و مش ماشيه من هنا !!

الناس يشيلوها م الارض ترمي نفسها زياده ..

لا اله الا الله بجد .. و حسبي الله و نعم الوكيل فيها هي بجد .. اللي بتعمله ده حرام و فضحت الدنيا وقومتني انا م النوم مفزوعه افتكرت حصل حاجه ف البيت .. و ف الاخر روحت ..

طب كان لازمته ايه ؟؟؟ خدتيه ف ايدك بقى تاني و انتي ماشيه ؟؟

و الله ما انا عارفه اخرت المستشفى دي ايه ؟؟

كده انا اللي حدخلها قريب :(

يا رب بكره المستشفى تديني اجازه و انام والنبي كام ساعه على بعض :(

اصعــــب قرار

اصعب قرار ..
طول الوقت .. طول ما البني ادم عايش .. بياخد قرارات .. ناس تفكر و تحسبها و تشوف اسوء الاحتمالات و بعدين تقرر ..
و ناس تانيه بتحب المجازفه و تقولك - فكر كتير .. تتعب كتير - لا انا قررت.. كده على طول ..
و ناس رائعه بصراحه .. ما بتقررش اصلا .. و راميه الحمل على غيرها يفكر و يقرر .. اللهم هيا بس تنفذ ..

دي الطرق اللي بيتاخد بيها القرار .. لكن القرار نفسه .. و الاصعب ..

هو انك تقرر تضحي .. تتنازل .. و احيانا تأذي نفسك عشان غيرك ..

زي اللي بيتبرع بكليته مثلا عشان ينقذ حد ..
اللي بيسيب دراسته عشان اخوه يتعلم .. لان الظروف الماديه ما تسمحش الاتنين يتعلموا ..
و غيره ..
او حتى بأساليب بسيطه .. انك تقرر تخفي حقيقه و تلبس نفسك موضوع كامل من اوله لاخره بكل عواقبه عشان ما توقعش الدنيا ف بعضها .. او تحافظ على عيله و تمشي المركب صح ..

ليه قرار صعب ؟؟

لانك للاسف الشديد عارف نتيجته كويس .. مدرك اخرته كويس .. صح او غلط مفيش حل تاني .. انك حتتأذي .. و حتخسر .. لكن حبك لغيرك و حبك للتضحيه عشانه قررته .. و انت ببتأذي و مضايق .. و حاسس انك ماشي عكس الطريق .. من هنا بتيجي الصعوبه ..

الامثله الحيه موجوده حوالينا طول الوقت .. معرفش اقولها كلها .. بس مـتأكده ان القرار بيبقى صعب :)

بس كده :D
ســـــــــــــــــلام