Exams Days

السلام عليكم ..

اليوم بدأ بأني صاحيه خايفه و قلقانه .. و يا ترى النهارده حيبقى عامل ازاي ؟ يا ترى حتمطر النهارده و لا كيلو العنب بقى بكام ؟؟
و جميع انماط الاسئله المنطقيه و الغير منطقيه ف دماغي ..

استغفرت ربنا و شغلت القرأن .. و ضربت النسكافيه و صليت عشان اهدى بقى ..
لكن اهدى ازاي و كريم ( اخويا ) ف البيت ..

ماسك ف ايده جمجمه .. و بيذاكر هو كمان عشان الامتحان بس anatomy بقى ... :)

و ف نفس الوقت مشغل "تامر حسني " .. كريم انت منين ماسك جماجم و عضم ف ايدك و منين نجم الجيل تامر ف ايدك برضه .. اظفر النقاش بنا على " خليكي ف اللي انتي فيه .. انتي مش عليكي امتحا ن ؟! "
بكل تواضع و عزه نفس .. سحبت نفسي و قلت انزل بقى لقضايا .. و قضى اخف من قضى ..
من 11 كنت ف الكليه انا و ايمان طبعا بنجري ورا بعض ف الورق و اي كارثه جديده نقراها نقلبها بكل فخر .. لان الوقت ازف ..

لكن بصراحه شديده .. الامتحان كان كويس الحمد لله .. طويل بس مش صعب .. ممل اه و كنت بنهج و انا بحل و حسه اني بطلع عماره 123 دور .. بس الحمد لله جـــــــــــــدا جت سليمه ..
و ربنا يستر ف الباقي ..
ســـــــــــــــلام بقى :)

============================================================

الساعه 11 و شويه دقايق..

خلصت مذاكره من ربعايه كده ..

مش فاكره الحقيقه حاجه من اللي اتذكرت قبل الربعايه ..

لكن ربنا يكرمنا بكره ..

و بكره بقى ابقى اكمل و اقول اللي حصل ..

انا خايفه اسيب البلوج اجي بكره مش طايقاه :D

لا لا .. ربنا حيسهل ان شاء الله ..

=====

الساعه 6 و شويه دقايق برضه ..

الامتحان كــــــــــــان حلو اوي الحمد لله ..

بس مزاجي مش اوي .. لكن اكيد برضه الحمد لله ..

الي اللقاء بقى مع ال CV !

=============================================================

الساعه سبعه و نص و شويه دقايق :)

الحمد لله جدا .. الامتحان كان حلو بس ..

IN DETAILS

بس كده المعلومه وصلت :D

و اخرتها بقى مع بتوع هندسه دول !

=============================================================

الساعه سبعه الا شويه دقايق ..

يا حلاوه و جمال و شقاوه امتحان النهارده ..

انا احوليت .. اي والله احوليت ..

بس ربنا ستر و حليت بعد ما احوليت ..

و كمان جبت اخري .. انا ما بقتش طايقه اصلا اجاوب .. بقيت بجاوب تخليص حق .. عشان اخلص

فاضل زلطه و نطلع بره .. يا رب !

studying effects

السلام عليكم ..

انا قلت لازم ادون اللحظه الجهنميه اللي انا فيها دلوقتي دي ..

انا و بلا فخر طول الترم بذاكر ايمدج و كمبيوتر فيجن ..

و قررت النهارده و بلا فخر برضه اني اذاكر HCI ..

انا غلطانه اصلا اني بقرر .. و غلطانه اني بذاكر .. و غلطانه اني دخلت الكليه من اساسه .. انا كنت اعدت ف البيت بالثانويه العامه شابه لطيفه زي الفل بكامل قوايا العقليه ..

و انا بذاكر حسه اني بطلع صهد من دماغي .. بل و حسه اني عبيطه .. مش بس كده بقيت بكلم نفسي و اضحك من غير سبب ..

الحمد لله انا كده خدت الجنسيه الحاسوباتيه ..

و حطلع منها ع التأهيل المهني عدل ..

انا كان لازم اكتب الكلمتين دول قبل ما اشيط !

التاني ‍!

كلاكيت تاني مره ..

النهارده كده انهينا امتحانات الشفوي وامتحان (واحد بس ) العملي .. الحمد لله ..
وشطبت على تاني حاجه ف اللسته ( بعز انا الشطب اوي )..

و حناخد اسبوع كامل بطوله و عرضه .. قبل المعركه الكبيره بين قوسين finall exams

ربنا يسترها معانا ..:)

ســـــــــــــلام .. و يا رب اللسته دي تتم على خير :D

الاول !

الحمد لله ...
حاسه اني قادره دلوقتي اخد نفس عميق براحه و سعاده ..
و ادي اول حاجه من اللسته اتشطبت ..

من غير تفاصيل كتير ..
اكتر لحظه حسيت اني فرحـــــــــانه اوي و بلمت.. لما اتقالنا " اخدتوا الفول مارك و لو في اكتر من الفول حديكوا "

سعيده بكل تفاصيل الكلمه ..

و يا رب عقبال الباقي ..

ســـــــــــلام ..:)

حنبدأ

طيب ..

يلا بقى عشان نبتدي .. و نشمر ..و ندخل بقلب جامد ع الايام الجايه دي ..

نبدأها بالامتحانات الشفوي ..

و تشطيبات مشروع ال HCI

امتحانات الفاينل بمختلف اشكالها و انواعها و اهم حاجه مفاجأتها ..

و برجوع بابا من السفران شاء الله بالسلامه.. و ده حوار تاني خالص لوحده :)..

و بالاجازه اللي مش حتبقى اجازه .. و حتبقى مطحنه بكميه الحاجات اللي عايزه اعملها و الكورسات و المذاكره اللي بحق و حقيقي مش الهذار اللي بنخده دلوقتي ده ..

اكيـــــــــــــــــد اني خايفه .. و اكيد شايله هم الحاجات دي و قلقانه ..

ده شعوري دلوقتي اللي يا رب لما اقرا الكلام ده بعدين اقول مالي كنت خايفه كده ليه ايه العبط ده ..:)

ربنا يعنا بجد ..

و يــــــــــــــــــا رب احقق اللي رسماه لنفسي و ما انامش ف السكه .. او اكسل .. او اي مؤثرات خارجيه تأثر عليا ..

ســــــــــــــــــــــــــــــــــــــــــــــــــــــــــــــــــــــــلام :)

كلمه شكر

السلام عليكم ..

البوست ده مخصوص لاحلى و اجمل صديقه و اخت ليا فعلا ... ايمــــــــــــــــــــان ..

من غير ما اقولك انا بحبك اد ايه .. انتي عارفه كويس ..

لكن انا عايزه اقولك ع الملاء... شكــــــــــــــــــراا ..

على حاجات كتيـــــــــــــــــــــــــر .. لكن اهمها و اللي خلتني اكتب البوست ده ..

وقوفك جمبي اليومين اللي فاتوا ..

لانهم يعتبروا من اصعب الايام اللي مرت عليا ..

رغم ان معظمها وقفتي معايا فيها ..

لكن دول بالذات كنت محتاجاكي اوي ..

و انتي ما ادتنيش فرصه حتى اقولك اني محتجاكي ..

و حتى لغايه النهارده ..

فضلتي برضه واخده بالك مني ..

و كنتي خايفه عليا اكتر ما انا خايفه على نفسي ..

ده انا كل ما اسرح تفتكري جرالي حاجه ..

تسألني " رنا انتي كويسه ؟"

مع اني والله كنت مركزه بس ف المحاضره

:D

انا فعلا بحبك اوي .. و عمري ما حعرف الاقي زيك بني ادمه كده ..

لازم اخلي بالي منك على فكره :)

ربنا ما يحرمني منك ابدا ..

The End !

اخيرااا..

اخيرا فيلم الامتحانات ده طلعله نهايه ..

اخيرا حيتشال من دور العرض ..

اخيرا الجمهور حيروح البيت ..

اخيرا حنااااام ..

الحمد لله بجد ان الاسبوع ده خلص ..

انا كنت بتعذب مش بمتحن ..

انام اربع ساعات بس او خمسه للامانه ..

طول الليل بحلم بحاجات مش منطقيه ..

و احلم بورق و اقلام .. و كأني ف مكتبه ..

المهم ربنا يجعل تعب الواحد بفايده ..

النهارده كمان كان يوم حلو ..

خلصنا " الانتحان " و انا و ايمان اعدنا نتمشى ف الكليه زي ما يكون علينا ندر ..

بعد ما خلصنا الطواف بتاعنا .. روحنا كوك دور ضربنا اتنين فاهيتا و بطاطس فرسكس و كوكا الحجم المبالغ فيه ..

لقينا لسه ف جيبنا قرشين كويسين .. نسكت بقى .. ابداا

اعدنا نتمشى و نتفرج على تشيرتات .. اللذيذ بقى ان احنا مش لاقيين حاجه تناسب الذوق الكلاسيك البسيط ..الدنيا كلها اصفر و اخضر و ازرق و فوشيا الخ الخ من الوان الربيع المبهجه ....

مفيش فايده يا ايمان ..

يعني خلاص يا رنا

شايفه حل تاني يا ايمان ؟

طب ما ده حلو يا رنا اهو

ده بتاع ولاد يا ايمان

الله بس حلو

يا حبيبتي احنا بنات ..انتي نسيتي ؟

طيب

اخيرا اقنعتها ..ان ده محل الولاد يا ايمان

..

عملنا طواف الوداع ف المشايه .. و ايمان فرهدت .. و انا كنت خارج نطاق الخدمه .. و بقينا ماشيين نعرج ف الشارع ..

فقررنا و ده طبعا قرار مش سهل علينا ان احنا كفايه بقى كده .. و يلا بينا نروح .. لاننا غالبا نسينا ان لينا بيت ..

بجد كان يوم حلو و لطيف كده ..

بجد كان اسبوع حرب ..

و اكيد اني عايزه انام اسبوع على الاقل من غير ما حد يقولي اني ف الكليه ..

يعني باختصار نفسي انام و اصحى الاقيني بنت خالي ..

اي حد تاني ..

مش ف حاسبات ..

انا حقوم انام بقى لحسن انا بقيت شايفه الحاجه الواحده بسبعه قدامي .. :

سلاااااام :D